BMT-nin Yəməndəki ofisi ələ keçirildi | İnsidentlə bağlı təcili bəyanat

Husilər Yəmənin paytaxtı Sənada BMT-nin İnsan Hüquqları üzrə Ali Komissarlığının ofisini nəzarətə götürüblər.

Bu barədə təşkilatın ali komissarı Volker Türk məlumat verib.

Bildirib ki, hücum zamanı ofisdə olan bütün sənədlər və nəqliyyat vasitələri müsadirə edilib.

Volker Türkün sözlərinə görə, bu hadisə BMT-nin qanunlarına tamamilə ziddir və təşkilatın mandatına ciddi hücumdur. Hadisə avqustun 3-də baş versə də, bəyanat yalnız indi verilib.

Ali komissar hücum edənlərdən BMT missiyasının binalarını boşaltmağı və bütün əmlakı qaytarmağı tələb edib.

Xatırladaq ki, Yəmən 2014-cü ildən bəri vətəndaş müharibəsi ilə üz-üzədir. Ölkənin şimalında husi qüvvələri hökumətə qarşı mübarizə aparır.

BMT-nin məlumatına görə, münaqişə nəticəsində 377 000 insan həlak olub. Hazırda milyonlarla insan humanitar yardıma ehtiyac duyur. Beynəlxalq ictimaiyyət tərəfləri sülh danışıqlarına çağırsa da, vəziyyət bu günə qədər də gərgin olaraq qalır.