Böyük Britaniyada iqtisadi gərginlik | 63 ilin rekord göstəricisi qeydə alındı

May ayında Böyük Britaniya büdcəsinin kəsiri 15 milyard funt-sterlinq, yəni 18,95 milyard dollar təşkil edib.

Bu məlumat Britaniya Milli Statistika İdarəsinin (ONS) hesabatında əksini tapıb.

Bu ilin mayında qeydə alınan göstərici 2023-cü ilin may ayı ilə müqayisədə 0,8 milyard funt-sterlinq artsa da, təxminən 15,7 milyard funt-sterlinq kəsir iqtisadçıların orta proqnozundan aşağı olub.

Büdcə gəlirləri illik müqayisədə 1,5 milyard funt-sterlinq artaraq 85,1 milyard funt-sterlinqə, xərclər isə 2,3 milyard funt-sterlinq artaraq 100,1 milyard funt-sterlinqə yüksəlib. Bu zaman dövlət borcuna xidmət xərcləri 8 milyard funt-sterlinq təşkil edib.

Aprel-may aylarında yeni dövlət borclanmasının ümumi həcmi ötən ilin eyni dövrü ilə müqayisədə 0,4 milyard funt-sterlinq artaraq 33,5 milyard funt-sterlinq təşkil edib.

Böyük Britaniyanın dövlət borcunun ümumi həcmi dövlət banklarından alınan borclar istisna olmaqla mayın sonunda ölkə ÜDM-nin təxminən 99,8 faizini təşkil edib. Dövlət borcunun ÜDM-ə nisbəti 1960-cı illərin əvvəllərindən bəri ən yüksək səviyyədədir.