Bu Avropa ölkəsi silahlanma yarışısına girdi, amma...

Polşa müasir tarixin ən böyük silahlanma proqramını həyata keçirir.

Silah alımlarına olan xərclər elə böyükdür ki, bu artıq Polşa dövlətinin maliyyə vəziyyəti ilə bağlı narahatlıq doğurur.

Belə ki, Polşa Müdafiə Nazirliyi 1000 ədəd Cənubi Koreya istehsalı K2 tankı, yüzlərlə Amerikanın "Abrams" tankı, 500 HIMARS reaktiv sistemi və bir neçə yüz Koreya istehsalı "K239 Chunmoo" reaktiv atəş sistemlərinin alınması üzrə müqavilələr imzalayıb.

Bu siyahıya hələ yüz ədəd "Apache" zərbə helikopteri, onlarla F-35 qırıcı təyyarəsi, əlavə "Patriot" zenit-raket kompleksləri və digər silahlar daxil deyil. Bütün bunlar hətta Polşa kimi inkişaf etmiş iqtisadiyyat üçün belə baha başa gəlir.

Ölkənin keçmiş müdafiə naziri Mariuş Blaşçakın sözlərinə görə, 3-4 il ərzində nazirlik artıq müqavilə bağlanmış hərbi texnika tədarükünün ödənişlərini həyata keçirə bilməyəcək.

O əlavə edib ki, Müdafiə və Maliyyə nazirlikləri arasındakı daxili yazışmalar da buna işarədir.

Mariuş Blaşçak sonda diqqətə çatdırıb ki, nazirlik iflas ərəfəsindədir.

Ekspertlər isə qeyd edirlər ki, bu satınalmaların maliyyələşdirilməsi həqiqətən də Varşava üçün ağır yükə çevrilib. Polşa Koreya silahlarını kreditlə əldə edir və plana əsasən, artıq 2027-ci ildə bu kreditlər üzrə ödənişlər üçün təxminən 80 milyard dollar ayrılmalıdır.