Culian Assanj sərbəst buraxıldı | “WikiLeaks”in rəhbəri nəyi etiraf edəcək?

Culian Assanj azadlığa çıxıb.

“WikiLeaks”in rəhbəri Culian Assanj 2019-cu ildən saxlanıldığı Britaniyanın Belmarş həbsxanasından çıxaraq ölkəni təyyarə ilə tərk edib. Bu barədə “WikiLeaks” məlumat yayıb.

“O, 1901 gün keçirdiyi Belmarşı iyunun 24-ü səhər tərk edib. London Ali Məhkəməsi onu girov müqabilində buraxıb. Assanj aeroporta gedib, təyyarə ilə Böyük Britaniyanı tərk edib”, – deyə təşkilatın “X” hesabında qeyd olunub.

“WikiLeaks” həmçinin Culian Assanjla ABŞ prokurorluğu arasında günahın etirafına dair razılığa gəlindiyi barədə ABŞ məhkəməsinin məlumatını təsdiqləyib. Buna rəğmən, təşkilat qeyd edib ki, razılıq hələ tam deyil.

Bir müddət öncə Şimali Marian Adalarının Federal Dairə Məhkəməsi həmin razılaşma çərçivəsində Assanjın günahının bir hissəsini etiraf edə biləcəyinə dair sənəd dərc etmişdi. Məlumata görə, bu, ona beş ildən sonra azadlığa çıxmaq şansı verir.

Assanjın ittihamın müəyyən hissəsini qəbul edə biləcəyi məhkəmə iclası Saypan adasında iyunun 26-da olacaq.