Dağıdıcı zəlzələ barədə qorxunc proqnoz | Bu ərazilərdə yer yerindən oynayacaq

Mütəxəssislər ABŞ-nin Sakit okean sahilləri üçün yaxınlaşan təhlükə barədə xəbərdarlıq edirlər.

Onların proqnozlarına görə, Kaskadiya subduksiya zonasında 8 bal gücündə baş verə biləcək güclü zəlzələ sahil boyunca torpağın təxminən 2 metr aşağı enməsinə səbəb ola bilər. Bu, Kaliforniya, Vaşinqton və Oreqon kimi ştatlar üçün fəlakətli nəticələrə gətirib çıxara bilər.

Okean tektonik plitələrinin kontinental plitələrin altına batdığı Kaskadiya subduksiya zonası indiyə qədər regionda dəniz səviyyəsinin qalxmasının qarşısını alan özünəməxsus bir qalxan rolunu oynayıb. Lakin qeyd olunur ki, cari onilliyin sonuna qədər qlobal istiləşmə nəticəsində dünya okeanının səviyyəsinin qalxma sürəti Kaskadiyanın qalxma tempini üstələyəcək.

Alimlər 8 bal gücündə zəlzələnin bu gün baş verdiyi ssenarini modelləşdirərək onu 2100-cü ildə dəniz səviyyəsinin 0,4-0,9 metr qalxması gözlənilən vəziyyətlə müqayisə ediblər.

Modellər göstərir ki, su altında qala biləcək ərazi bu gün zəlzələ zamanı 300 kvadratkilometr olduğu halda gələcəkdə 370 kvadratkilometrə qədər arta bilər.

Mütəxəssislər xəbərdarlıq edirlər ki, iqlim dəyişikliyi səbəbindən dəniz səviyyəsinin qalxması ilə birlikdə baş verə biləcək “böyük zəlzələ” sahilboyu yaşayış məntəqələrinin görünüşünü tamamilə dəyişə bilər: şəhərlər və qəsəbələr həmişəlik su altında qalacaq.