Davudoğlunun AKP ilə bağlı son açıqlamaları ilə diqqət çəkdi | Prezident çağırarsa, gedərəm…

Türkiyədə fəaliyyət göstərən “Gələcək” Partiyasının başqanı Əhməd Davudoğlu AKP ilə bağlı son açıqlamaları ilə diqqət çəkir.

Konyada keçirdiyi mətbuat konfransında “Mən ruhən AK Partiyadan heç ayrılmamışam”, – deyən Ə.Davudoğlu daha sonra canlı yayımda əlavə edib: “Prezident çağırarsa gedərəm”.

Bu açıqlamalar sosial mediada geniş əks-səda doğurub, bir çox istifadəçi tərəfindən “U dönüşü” kimi qiymətləndirilib.

AKP hökumətlərində xarici işlər naziri, baş nazir kimi vəzifələrdə çalışan, lakin 2016-cı ildə istefaya məcbur edilən və iqtidardan kənarlaşdırılan Əhməd Davudoğlu dünən KRT-nin sualını belə cavablandırıb:

“O kütlələrin tarixi AK Partiyadan başlamır, 28 fevraldan, 12 sentyabrdan başlayır. Yassıada məhkəmələri ilə başlayır. Mən o kütlələrdən gəldim, o mühafizəkar kütlələrin sözçüsü və müəllimi oldum. “AK Partiyanın yanındayam” deyərkən nəzərdə tutduğum odur ki, AK Partiyanın bugünkü kadrları o günün prinsiplərini tərk ediblər, amma mən onlardan əl götürməmişəm”.

Ə.Davudoğlunun siyasi mövqeyi və gələcək addımları ilə bağlı maraq artsa da, ictimaiyyət bu müzakirələrin necə formalaşacağını diqqətlə izləyir.

Qeyd edək ki, “Gələcək” Partiyası CHP-nin dəstəyi ilə Türkiyə Böyük Millət Məclisində 10 deputatla təmsil olunur.