Dərisinin rəngi qadını təşvişə saldı | Yerkökü yemək təhlükəlidir?

Böyük Britaniyada yaşayan bir qadının yerkökünə olan sevgisi səbəbindən dərisinin rəngi narıncıya çalmağa başlayıb.

"Daily Mail" nəşri bu barədə xəbər yayıb.

Qadının sözlərinə görə, çəkdirdiyi bir fotoda dərisinin narıncı ton aldığını görüb təşvişə düşüb və bu halı sarılıq xəstəliyi ilə əlaqələndirib. İnternetdə apardığı araşdırmadan sonra isə özünə "karotinemya" diaqnozunu qoyub. Bu, yerkökünün tərkibində olan piqmentin, yəni beta-karotinin qanda yığılması ilə bağlı vəziyyətdir.

Hadisədən sonra qadın yerkökü istehlakını əhəmiyyətli dərəcədə azaldıb ‒ gündəlik beş ədəd orta ölçülü yerköküdən bir porsiyaya enib.

"Əslində, çox yerkökü yemişəm. Adətən naharda kəsmiklə birlikdə bol miqdarda yerkökü yeyirdim. Çünki həm dadını sevirəm, həm də ucuzdur", ‒ deyə qadın etiraf edib. Həkimlərin bildirdiyinə görə, yerkökü, eləcə də manqo, ərik və balqabaq kimi meyvə və tərəvəzlərin tərkibində "beta-karotin" adlı təbii piqment var. Bu maddə onlara xarakterik rəng verir. Uzun müddət bu piqmentin yüksək miqdarda qəbulu dəridə sarımtıl-narıncı rəng dəyişikliyinə səbəb ola bilər. Lakin bu hal orqanizm üçün zərərli sayılmır.