Dünya durmadan artan şəkərli diabet təhlükəsi ilə üz-üzə

Son statistik göstəricilər Böyük Britaniyada şəkərli diabetin yayılmasının kritik həddə çatdığını nümayiş etdirir.

2023-cü ildə ölkədə şəkərli diabet diaqnozu qoyulmuş insanların sayı 4,4 milyondan 4,6 milyona yüksəlib. Bundan əlavə, təxminən 1,3 milyon insanın 2-ci tip diabetə malik olduğu, lakin hələ diaqnoz almadığı bildirilir. 6,3 milyon insan isə diabet təhlükəsi ilə üz-üzədir. Sadəcə, diabet hesab ediləcək səviyyəyə çatmayıblar.

Vaxtında müdaxilə olunmadıqda onlarda ikinci tip diabetin inkişaf riski artır. Ümumilikdə, Böyük Britaniyada 12 milyondan çox insan – hər beş yetkindən biri diabetdən əziyyət çəkir.

Diabetin infarkt, insult, böyrək xəstəlikləri, göz problemləri, sinir zədələnmələri və amputasiya kimi ciddi fəsadlara səbəb ola biləcəyi vurğulanır.

Bu xəstəlik təkcə Böyük Britaniyada deyil, bütün Avropa və dünya üzrə artan tendensiyanı göstərir. “Lancet” tibb jurnalının qlobal hesablamalarına görə, 2022-ci ildə 828 milyon insan şəkərli diabetdən əziyyət çəkib ki, bu da 1990-cı illə müqayisədə 630 milyon nəfərlik artım deməkdir.