Dünyanı havadan idarə edən nəhəng | "Qiyamət günü" təyyarəsi

"Qiyamət günü" təyyarəsi kimi tanınan "E-4B Nightwatch" ABŞ Hərbi Hava Qüvvələrinin mobil komanda mərkəzidir və fövqəladə vəziyyətlər, o cümlədən nüvə hücumları zamanı istifadə edilmək üçün nəzərdə tutulub. Bir təyyarənin dəyəri 223 milyon dollardır.

Bu modifikasiya edilmiş "Boeing 747-200" ABŞ Prezidentini, müdafiə nazirini və digər hərbi rəhbərləri daşıyır, onları elektromaqnit impulslardan qoruyur və peyk sistemləri vasitəsilə rabitəni təmin edir. Hazırda Hərbi Hava Qüvvələri Nebraska ştatında yerləşən dörd "E-4B" təyyarəsinə malikdir və onlardan ən azı biri həmişə dərhal istifadəyə hazırdır.

Təyyarə daimi olaraq havada olmasa da, ondan sınaq missiyaları, yüksək təhlükəsizlik tədbirləri və müdafiə nazirinin Amerika qitəsindən kənara uçuşları üçün istifadə olunur. Lazım olduqda təyyarə uçuş zamanı yanacaq doldurma sayəsində havada tam bir həftə qala bilər.

Qeyd edək ki, "E-4B" təyyarəsi son dəfə 11 sentyabr 2001-ci il hadisələri zamanı Vaşinqton‒Kolumbiya dairəsi üzərində böyük bir əməliyyatda istifadə edilmişdi.