Əl-Əqsa məscidinə basqın edildi

Qüdsdəki Əl-Əqsa məscidində İsrail əsgəri tərəfindən 350-dən çox fələstinli saxlanılıb. Bu barədə “Frans-Press” agentliyi İsrail polisinə istinadən məlumat yayıb.

Qeyd edək ki, bundan əvvəl Fələstin mediası Əl-Əqsa məscidində İsrail təhlükəsizlik qüvvələri ilə toqquşmalarda onlarla fələstinlinin yaralandığını bildirib. İsrail hüquq-mühafizə orqanlarının bu əməliyyatından sonra isə İordan çayının qərb sahilində bir sıra şəhərlərdə nümayişlər başlayıb. Məsciddəki əməliyyat artıq İordaniya və Misir tərəfindən pislənib.

İsrail tərəfi bildirib ki, ölkənin Müdafiə Ordusunun döyüş təyyarələri və tankları aprelin 4-də İsrail ərazisinə edilən raket hücumlarına cavab olaraq Qəzza zolağına, radikal Fələstin HƏMAS hərəkatının hərbi təlim bazasına və hərbi postlarına hücum edib.

Türkiyə isə İsrail təhlükəsizlik qüvvələrinin aprelin 4-ü gecədən etibarən Əl-Əqsa məscidinə basqın etməsini, onun müqəddəsliyini və tarixi status-kvonu pozaraq çoxlu sayda fələstinli vətəndaşı həbs etməsini qınayır. Bu barədə Türkiyə XİN-in bəyanatında deyilir.

Qeyd olunub ki, mübarək Ramazan ayında Əl-Əqsa məscidində namaz qılanlara qarşı bu hücumlar qəbuledilməzdir.