Ermənistanda ruslara qarşı qeyri-insani hərəkətlər edildi

Rusiya Prezidenti yanında Vətəndaş Cəmiyyətinin İnkişafı və İnsan Haqları Şurasının rəhbəri Valeri Fadeyev İrəvan hava limanında rusiyalılara qarşı ayrı-seçkilik halları ilə bağlı Ermənistanın Moskvadakı səfiri Vaqarşak Arutyunyana müraciət edib.

Rusiya mətbuatında yayılan məlumatda bildirilib ki, Ermənistanın "FlyOne" aviadaşıyıcısının nümayəndələri və Zvartnots Beynəlxalq Hava Limanının əməkdaşları tərəfindən hüquqlarının pozulması ilə üzləşən Rusiya vətəndaşlarının müraciətləri Şuraya daxil olub.

"Açıq mənbələrdəki nəşrləri oxuyaraq belə qənaətə gəldik ki, təsvir olunan hallar, təəssüf ki, tez-tez yaşanır. Rusiya vətəndaşlarına qarşı bu cür insidentlər yolverilməzdir", – deyə məktubda qeyd olunub.

Şuradan xüsusilə bildirilib ki, iyulun 6-da rusiyalı opera müğənnisi Svetlana Kasyan azyaşlı qızı ilə Almaniyadakı qastrol səfərindən İrəvandan keçməklə geri qayıdıb. Ana və qızı boş oturacaqları olmayan təyyarəyə mindiriliblər, daha sonra ayaq üstə uçmaları xahiş edilib. Havaya qalxmazdan əvvəl isə bir stəkan su belə verilməyib.

Məlumat üçün bildirək ki, bundan əlavə, iyunun 3-də Roma-İrəvan-Moskva marşrutu ilə uçan bir qrup rusiyalı Romadan uçuş gecikdiyi üçün Moskvaya gedən təyyarəyə minə bilməyib.

Hava limanının əməkdaşları isə problemi həll etmək əvəzinə onları heç bir izahat vermədən saxlayıb və polis şöbəsinə yerləşdiriblər.