Eyfel qülləsi hindu qrupunun ziyarətindən sonra bağlanıb

Parisdə Eyfel qülləsi işçilərin tətili səbəbindən bağlanıb.

İşçilər qadın əməkdaşların hindistanlı dini nümayəndə heyətinə xidmət göstərməsinə qoyulan məhdudiyyətə etiraz ediblər.

Hadisə ənənəvi hindu BAPS hərəkatının 100-ə yaxın üzvünün Eyfel qülləsinə səfəri zamanı baş verib. Qrup Fransanın Bussi-Sen-Jorj şəhərində hindu məbədinin açılışı ilə bağlı tədbirlər üçün Parisə gəlib. Səfərdən əvvəl BAPS nümayəndələri Eyfel qülləsini idarə edən SETE şirkətindən qadın əməkdaşların ruhani liderlə təmasını məhdudlaşdırmağı xahiş edib. Şirkət bu tələbi qəbul edib.

Bu qərar işçilərin narazılığına səbəb olub. Onlar sentyabrın 7-də tətil elan ediblər. SETE daha sonra məsələyə münasibət bildirib. Şirkət qərarın düzgün olmadığını açıqlayıb. Bildirilib ki, bu yanaşma qadın və kişilər arasında bərabərlik prinsipinə uyğun deyil.

SETE həmçinin vurğulayıb ki, dini və ya mədəni səbəblər belə bir ayrı-seçkiliyə əsas verə bilməz. Qərarın kim tərəfindən təsdiqləndiyi hələ məlum deyil.