Fransa ilə Ermənistan razılığa gəldi | Fransız səfirdən açıqlama

“Ermənistanla müdafiə sahəsində əməkdaşlığa başlamışıq. Bu, münasibətlərimizdə yeni bir mərhələdir və çox geniş vüsət alır”.

Bunu Fransanın Ermənistandakı səfiri Olivye Dekottini xarici mediaya müsahibəsində deyib.

Səfir həmçinin "Paris on il əvvəl silahlı qruplaşmaları zərərsizləşdirmək üçün Mali və ya Liviyaya qoşun yeritdiyi kimi, Ermənistana öz qoşunlarını göndərməyi düşünə bilərmi?" sualına da cavab verib:

“İlk olaraq deyim ki, son bir neçə ay ərzində iki ölkə arasında üç istiqamətdə sazişlər imzalanıb. Bu istiqamətlər Ermənistanı müdafiə silahları ilə təmin etmək, ölkənin Silahlı Qüvvələri ilə Ermənistanda və ya Fransada təlim keçmək və həmçinin Ermənistan Müdafiə Nazirliyinə məsləhətlər verməkdir.

Sualınıza gəldikdə isə deyim ki, biz çox fərqli bir vəziyyətdən danışırıq. Afrikanın Sahel bölgəsində keçirilən əməliyyatlar antiterror əməliyyatları olub. Burada bizim dövlət-dövlət əməkdaşlığımız var və biz Ermənistan Silahlı Qüvvələrinin güclənməsinə töhfə verməyə çalışırıq. Bir daha deyirəm, nəyinsə baş verməsini gözləmirik. Nəyinsə baş verməməsi üçün lazım olanı etməyə çalışırıq".

Qeyd edək ki, Fransanın Ermənistandakı səfiri Olivye Dekottini bundan öncə açıqlama verərək bildirib ki, Paris bir çox ölkənin arzusunda olduğu hərbi texnikanı İrəvana verib.