Gəmilərdən alınan rüsumlar nə qədər artırılacaq? - Detallar açıqlandı

Türkiyə 1 iyuldan ənənəvi illik yeniləmə çərçivəsində Boğaziçi və Çanaqqala boğazlarından keçid haqqını artıracaq. Bu, 2022-ci ildən bəri edilən dördüncü artım olacaq.

Bu barədə Türkiyənin nəqliyyat və infrastruktur naziri Əbdülqadir Uraloğlu məlumat verib.

“Montre Konvensiyasına əsasən, Boğaziçi və Çanaqqala boğazlarından tranzit edən gəmilərdən alınan rüsumlar xalis tonnaja uyğun hesablanır. 2025-ci il iyulun 1-dən onlar əvvəlki ilin tarifləri ilə müqayisədə 15 % artırılacaq və 5,83 ABŞ dolları təşkil edəcək. Bu, 2022-ci ildə Prezidentin fərmanı ilə başlanmış tariflərin yenidən gözdən keçirilməsi prosesində dördüncü mərhələdir”, – deyə nazir bildirib.

Ə.Uraloğlu qeyd edib ki, 2022-ci ildən gəmilərin keçidinin qiyməti 7,2 dəfə artıb. Eyni zamanda gəmilər 2022-ci ilə qədər boğazlardan keçidə görə hər ton üçün 0,8 dollar ödəyib. Yığılan rüsumun əhəmiyyətli hissəsi sahil xidmətlərinin, xilasedicilərin və həkimlərin işinin maliyyələşdirilməsinə yönəldilib.