Güclü zəlzələ Yaponiyanı alt-üst etdi | Ölənlərin sayı artır
Yaponiyada baş verən zəlzələlər nəticəsində ölənlərin sayı 24 nəfərə çatıb, 50-dan çox insan müxtəlif dərəcəli xəsarətlər alıb.
Həyatını itirənlərin hamısı yeraltı təkanların ən çox hiss olunduğu və ən böyük dağıntılara səbəb olduğu İsikava prefekturasının sakinləridir. Bu ərazidə taxta evlərin və yaşayış binalarının azı 50 faizi dağılıb, 200-dən çox ev yanıb.
Hadisə yerində xilasedicilər və yanğınsöndürənlər işləyir. Faciənin nəticələrinin aradan qaldırılmasına kömək etmək üçün Yaponiyanın özünümüdafiə qüvvələrinin bölmələri bölgəyə göndərilib. Dağıntılar altında hələ də insanların ola biləcəyi ehtimal edilir.
Təbii fəlakətlə bağlı Yaponiya İmperator Evi Tokioda İmperator Naruhito və ailə üzvlərinin iştirakı ilə yanvarın 2-də keçirilməli olan Yeni il tədbirini ləğv etmək qərarına gəlib.