Hindistanın Pakistana hücumuna Çindən cavab | Vəziyyət daha da gərginləşdi

Çin Xarici İşlər Nazirliyi Hindistan və Pakistanı sakit olmağa və gərginliyə səbəb ola biləcək hərəkətlərdən çəkinməyə çağırıb.

Ölkənin xarici siyasət qurumu Hindistanın Pakistana qarşı son addımlarının regionda narahatlıq yaratdığını bildirib.

“Hindistan və Pakistanı sülh və sabitliyə üstünlük verməyə, sakit və təmkinli olmağa və vəziyyəti daha da çətinləşdirəcək addımlardan çəkinməyə çağırırıq”, ‒ Çin Xarici İşlər Nazirliyinin bəyanatında deyilir.

Çin tərəfi qeyd edib ki, Pekin Hindistanın Pakistana qarşı hərbi əməliyyatından təəssüflənir və mövcud hadisələrdən narahatdır: “Çin terrorizmin bütün formalarına qarşıdır”.

Hindistan Müdafiə Nazirliyi bundan əvvəl bəyan edib ki, mayın 7-nə keçən gecə silahlı qüvvələr Pakistana qarşı əməliyyata başlayıb. Bundan sonra Hindistan Cəmmu və Kəşmirin Pakistanın nəzarətində olan hissəsində 9 hədəfə zərbələr endirib. Pakistan Hindistanın təcavüzkar addımına sərt cavab verib. Nəticədə Hindistan 5 qırıcısını itirib.

Hər iki tərəfdən ölən və yaralananlar var.