II əsrə aid tapıntılar nədən xəbər verir?

Türkiyənin Antalya vilayətində yerləşən Side antik şəhərində təxminən 390 metr uzunluğunda “B” küçəsində aparılan arxeoloji qazıntılar başa çatıb.

Bu barədə Türkiyənin mədəniyyət və turizm naziri Mehmet Nuri Ersoy məlumat verib.

Qazıntıların aparıldığı küçə Side antik şəhərinin əsas nəqliyyat istiqamətlərindən biri olub. Mütəxəssislərin araşdırmalarına əsasən, küçənin şimal hissəsində eramızın II əsrinə aid stoa və onun arxasında çoxsaylı məkanlar yerləşib.

Küçədə qərbdən şərqə doğru “Qərb qapısı”, “Herakl qapısı” və “Şimal hamamı qapısı” adlandırılan üç monumental giriş aşkarlanıb. Onların arasında “Herakl qapısı” üzərindəki relyeflərlə diqqəti cəlb edir. Burada Heraklın 12 qəhrəmanlığını əks etdirən səhnələrlə yanaşı, qədim yunan mifologiyasının tanrıları Athena, Zevs, Artemida, Higeya və Tixenin təsvirləri də yer alır.

Eramızın III əsrinin əvvəllərinə aid olduğu müəyyən edilən bu relyeflərin Son Antik dövrdə “Herakl qapısı”nın inşası zamanı ikinci dəfə tikinti materialı kimi istifadə edildiyi bildirilir.