İllərlə orqanizmdə əlamət olmasa da... | Həkimdən xəbərdarlıq

Uzunmüddətli stres herpes və kəmərləyici dəmrov kəskinləşməsinə səbəb ola bilər. Bu viruslar orqanizmə daxil olduqdan sonra tamamilə yox olmur, passiv vəziyyətə keçərək sinir düyünlərində qalırlar.

Bunu rusiyalı tibb elmləri namizədi İrina Kraşkina bildirib.

Həkimin sözlərinə görə, söhbət I və II tip herpes simplex viruslarından, həmçinin suçiçəyi virusundan gedir. İlkin infeksiyadan sonra viruslar illərlə orqanizmdə heç bir əlamət yaratmadan qala bilərlər. Müəyyən şəraitdə isə aktivləşərək sinir lifləri boyunca dəriyə yayılır və səpgilərə səbəb olur. Güclü gərginlik zamanı beyin, hipofiz və böyrəküstü vəziləri birləşdirən sistem aktivləşir və kortizolun səviyyəsi artır. Bu hormon orqanizmin stresə uyğunlaşması üçün vacibdir.

Mütəxəssis qeyd edib ki, stresdən əlavə, herpes viruslarının kəskinləşməsinə immunitetin zəifləməsi, kimyaterapiya, onkoloji xəstəliklər, hipotermiya, ultrabənövşəyi şüalanma, yuxusuzluq, xroniki yorğunluq, bəzi vitaminlərin çatışmazlığı, hamiləlik və 50 yaşdan yuxarı olmaq da təsir göstərə bilər.

Residivlərin qarşısını almaq üçün həkim yuxu rejimini normallaşdırmağı, müntəzəm orta səviyyəli fiziki fəaliyyətlə məşğul olmağı və stresin idarə olunması üsullarından yararlanmağı tövsiyə edir.