İnsanlar Əl-Faşirdən çıxsa da, ölümdən qaça bilmirlər

Yaxın Şərqdəki humanitar böhranın fonunda daha bir fəlakət Sudanda yaşanır. Bundan əvvəl aclıqla sınanmış Sudan xalqı 3 ildir ki, vətəndaş müharibəsi və hakimiyyət uğrunda mübarizənin qurbanına çevrilib. 

“Biz Əl-Faşirdən ayrılarkən döyüşlər çox şiddətli idi. Qaçmağa məcbur olduq. O qədər sürətlə qaçırdıq ki, yolun yarısına çatanda istiqamətimizi itirib naməlum tərəfə doğru hərəkət etməyə başladıq. Amma biz qaçmağa davam etdik, çünki başqa çarəmiz yox idi. Yolboyu isə çox əziyyət çəkdik”, – deyə Əl-Faşir sakini Rəşidə İbrahim Əli bildirib.

Digər Sudan vətəndaşı Fəvziyyə Həsən isə belə deyib:

“Əl-Faşirdə şəhid olan əsgər oğlum da daxil olmaqla orada saysız-hesabsız insan öldü. Digər oğlum isə sinəsindən və gözündən yaralandığı üçün dünən əməliyyat olundu. Təsadüfi atəşlərin açılması nəticəsində hər gün ən azı 30-40 nəfər həlak olur. Əl-Faşirdə daha əvvəllər də əzab-əziyyətin şahidi olmuşuq, lakin belə dəhşətli bir hadisə görməmişdik. Yollar isə quldurlarla doludur. Onlar insanları döyür, pullarını və mallarını, hətta yorğanlarını belə oğurlayırlar. İnsanlar daha çox aclıqdan əziyyət çəkirlər. Çox insan qida çatışmazlığı, malyariya və anemiyadan ölür”.

Qeyd edək ki, Sudan Ordusu ilə Çevik Dəstək Qüvvələri arasında Darfur və Kordofan əyalətlərində ciddi toqquşmalar yaşanır. Şiddətli hücumlar səbəbindən 71 mindən çox insan paytaxt Əl-Faşiri tərk edib.