İran bu dəfə hansı ölkəni ballistik raketlə vurdu? - Baku TV

Səudiyyə Ərəbistanının "Samref" neft emalı zavodu hava hücumuna məruz qalıb. Hücum nəticəsində dəymiş ziyanın cüzi olduğu bildirilir.

Xatırladaq ki, martın 19-da İslam İnqilabı Keşikçiləri Korpusu (SEPAH) bəyanat yayaraq Səudiyyə Ərəbistanı, Birləşmiş Ərəb Əmirlikləri və Qətərdəki bir neçə neft obyektinin əməkdaşlarının, o cümlədən "Samref" neft emalı zavodunun işçi heyətinin təxliyəsinə çağırıb.

Qeyd edək ki, "Samref" neft emalı zavodu "Saudi Aramco" və "ExxonMobil" şirkətlərinin birgə müəssisəsidir. Bu liman hazırda Səudiyyə Ərəbistanı neftinin ixracı üçün yeganə məntəqədir.

Küveytdəki əl-Əhmədi limanında ölkənin neft korporasiyasına məxsus neft emalı zavoduna da PUA zərbələri endirilib, ardınca yanğın baş verib.

Bildirilib ki, PUA hücumu Mina əl-Əhmədi neft emalı zavodunda kiçik yanğına səbəb olub, heç kim xəsarət almayıb. Mina əl-Əhmədi neft emalı zavodu Yaxın Şərqdəki ən böyük zavodlardan biridir, onun istehsal gücü gündəlik 730 min bareldir.

Ras Laffan sənaye zonasına zərbələrin də İran tərəfindən endirildiyi qeyd olunub.

Qətərin Müdafiə Nazirliyi "X" sosial şəbəkəsində məlumat paylaşaraq bildirib ki, Qətər Dövləti İrandan ballistik raket hücumuna məruz qalıb, nəticədə, Ras Laffan sənaye şəhərinə ziyan dəyib.

Martın 18-də "Qatar Energy" dövlət neft-qaz şirkətindən bildirilib ki, Ras Laffandakı sənaye obyektləri raket atəşinə tutulub. Əmirliyin Daxili İşlər Nazirliyi əvvəlcə hücum nəticəsində başlayan yanğını lokallaşdırdığını elan edib, lakin sonradan alovun hələ nəzarətə alınmadığını dəqiqləşdirib. Zərərçəkənlər barədə məlumat verilməyib.