İran Türkiyəyə raket atdı, nazirlər təcili telefonla danışdı, Səfir XİN-də çağırıldı - Baku TV

Türkiyənin xarici işlər naziri Hakan Fidan və Pakistanın Baş nazirinin müavini, xarici işlər naziri Məhəmməd İshaq Dar telefon danışığı zamanı İranın Türkiyə istiqamətində ballistik raket atmasını müzakirə ediblər.

Bu barədə Pakistan Xarici İşlər Nazirliyi "X" sosial şəbəkəsində məlumat yayıb.

"Tərəflər regionda artan gərginlik ətrafında fikir mübadiləsi aparıb, davam edən hücumlar, o cümlədən Türkiyəyə qarşı son hücum cəhdi ilə bağlı ciddi narahatlıqlarını ifadə edib, gərginliyin dərhal azaldılmasını və təmkinliliyin zəruriliyini vurğulayıblar", – deyə məlumatda bildirilib.

Məhəmməd İshaq Dar Pakistanın Türkiyə ilə həmrəy olduğunu və ölkələrin regional sülh və sabitliyin qorunması üçün səyləri əlaqələndirməyə hazır olduqlarını təsdiqləyib.

Qeyd edək ki, məsələyə Türkiyə lideri Rəcəb Tayyib Ərdoğan da münasibət bildirib.

"Bölgəmizin çətin günlərdən keçdiyi bir vaxtda işi qətiyyən təsadüfə buraxmırıq. Baş verən hadisədə olduğu kimi, NATO üzrə müttəfiqlərimizlə sıx məsləhətləşmələr apararaq bütün zəruri tədbirləri görür və dərhal lazımi müdaxiləni edirik", – deyə Rəcəb Tayyib Ərdoğan vurğulayıb.

Xatırladaq ki, hadisə ilə bağlı İranın Ankaradakı səfiri Türkiyə Xarici İşlər Nazirliyinə çağırılıb. Ankaranın narahatlığı və reaksiyası İran tərəfinə çatdırılıb.