İranın Hindistandakı səfirliyi Marko Rubionun açıqlamasına cavab verdi - Baku TV

"İran dünyanın ən böyük neft ixracatçısı kimi həmişə öz enerji resurslarını digər ölkələrə təqdim etməyə hazırdır".

Bu barədə İranın Hindistandakı səfirliyinin ABŞ-nin dövlət katibi Marko Rubionun Tehranın "dünya enerji bazarını girov saxladığı" barədə iddialarına cavab olaraq yaydığı press-relizdə deyilir.

"İranın Hindistandakı səfirliyi ABŞ dövlət katibinin son açıqlamalarını rədd edir və vurğulayır ki, bu cür iddialar reallığı təhrif etmək üçün açıq cəhddir. Dünyanın ən böyük neft və enerji daşıyıcıları ixracatçılarından biri olan İran Hindistan da daxil olmaqla, öz enerji resurslarını bütün ölkələrin sərəncamına verməyə həmişə hazır olub", – deyə bəyanatda vurğulanıb.

Səfirlikdən qeyd edilib ki, dünya enerji bazarını son illər ABŞ-nin İran neftinin ixracına qarşı tətbiq etdiyi sanksiyalar girov saxlayıb.

"İrana iqtisadi təzyiq göstərmək məqsədilə beynəlxalq hüquq prinsipləri və BMT Nizamnaməsi pozulmaqla hazırlanıb tətbiq edilmiş sanksiyalar", – deyə diplomatik nümayəndəlikdən əlavə edilib.

Həmçinin bildirilib ki, ABŞ və İsrailin Fars körfəzi regionundakı hərbi əməliyyatları Hörmüz boğazında dəniz təhlükəsizliyini, gəmiçiliyi pozur və təhlükə yaradır.