İraqda ümummilli matəm elan edildi

İraq hakimiyyəti ABŞ Hərbi Hava Qüvvələrinin sərhəd bölgələrinə hücumu nəticəsində həlak olanların xatirəsinə ümummilli matəm elan edib.

Bu barədə ölkənin Baş naziri fərman imzalayıb.

İraq hökumətinin məlumatına görə, bombardman nəticəsində 16 nəfər ölüb, 25 nəfər yaralanıb.

ABŞ-nin Bağdaddakı müvəqqəti işlər vəkili Devid Berkeri Xarici İşlər Nazirliyinə çağırılıb və ona etiraz notası verilib. Bildirilib ki, etiraz notası ABŞ-nin İraqa endirdiyi zərbələr və bunun nəticəində 16 nəfərin ölümü ilə bağlıdır.

Bu arada İraq parlamenti ABŞ-nin endirdiyi zərbələri və onun nəticələrini müzakirə etmək üçün təcili iclas keçirəcək. Deputatlar həmçinin İraqın suverenliyini beynəlxalq koalisiya qüvvələri tərəfindən pozulmasına son qoyması barədə müzakirələr aparacaqlar.

Söhbət İŞİD terror qruplaşması ilə mübarizədə ABŞ-nin rəhbərlik etdiyi koalisiyadan gedir. Koalisiya qüvvələrinin bir hissəsi İraq ərazisində yerləşir. İraq hökuməti bu yaxınlarda Vaşinqtonla xarici hərbçilərin ölkədən çıxarılmasını koordinasiya etmək niyyətində olduğunu açıqlayıb.

Parlamentin bəyanatında vurğulanır ki, hazırda xarici hərbi mövcudluğu davam etdirməyə ehtiyac yoxdur. ABŞ və müttəfiq qüvvələrin ölkədə olması İraqın müstəqilliyinə təhlükədir.

Qeyd edək ki, fevralın 3-də gecə saatlarında ABŞ Suriya və İraqa silsilə zərbələr endirib.