İspaniya Baş naziri videomüraciət yaydı

İspaniyanın Baş naziri Pedro Sançes Avropa İttifaqını mövsümi saat dəyişməsini tamamilə ləğv etməyə çağırıb.

Bu barədə o, "X" platformasında yayımlanan videomüraciətində bildirib.

Sançes bu il 26 oktyabra nəzərdə tutulan qış saatına keçidin mənasız olduğunu deyib.

O xatırladıb ki, Avropa Komissiyası 2018-ci ildə saatların dəyişdirilməsini dayandırmağı təklif etmişdi, lakin hələ qərar qəbul edilməyib.

Baş nazir qeyd edib ki, həm İspaniyada, həm də digər Aİ ölkələrində əhali əksər hallarda saat dəyişməsini dəstəkləmir.

O, sosial sorğulara və elmi tədqiqatlara istinad edərək bildirib ki, mövsümi saat dəyişməsi elektrik enerjisinə qənaətə demək olar ki, kömək etmir, lakin insanların sağlamlığına və gündəlik həyatına mənfi təsir göstərir.

Qeyd edək ki, bu məsələ 20 oktyabrda Lüksemburqda keçirilən Avropa İttifaqının nəqliyyat, telekommunikasiya və enerji nazirlərinin sammitinin gündəliyinə daxil edilməyib.

2018-ci ildə Avropa Komissiyasının apardığı sorğuda Aİ sakinlərinin 84%-i mövsümi saat dəyişməsinin ləğvini dəstəkləyib. 2024-cü ildə Almaniyada 74% respondent eyni fikri bildirib. Bu təşəbbüsü Polşa, Finlandiya və bir sıra digər ölkələr də dəstəkləyir.