İspaniyada fermerlər ayağa qalxdı | Etirazçılardan qeyri-adi təklif

İspaniyada fermer etirazlarını təşkil edən ictimai hərəkat üzvləri nümayişlərin istiqamətinin dəyişdirilməsi ilə bağlı maraqlı fikirlər irəli sürüblər.

Onlar iğtişaşlara heyvanların da cəlb olunmasını təklif ediblər.

"Bu gündən etibarən heyvanlar İspaniyanın yollarında gəzəcək", – deyə hərəkatın nümayəndəsi Xayme de Pena bildirib.

Bundan əlavə, nümayəndə fermerlərin traktorlarla keçirdiyi etirazlar zamanı polisin güc tətbiq etməsinə də qarşı çıxıb. O, əmrlərin bilavasitə İspaniya Daxili İşlər Nazirliyindən verildiyini də bildirib.

“Demokratik ölkədə buna yol vermək olmaz” deyən Xayme de Pena nümayişlər zamanı 60 nəfər zərərçəkənin yerli və Avropa məhkəmələrinə müraciət edəcəyini vurğulayıb.

Xatırladaq ki, İspaniyada fermerlərin etirazları fevralın 6-da başlayıb. Nümayişlər nəticəsində onlarla etirazçı saxlanılıb. Onlar sektorun düşdüyü çətin vəziyyətə diqqət çəkməklə yanaşı, Avropanın kənd təsərrüfatı siyasətinə də qarşı çıxıblar.