İspaniyada yanğın fəlakəti niyə yaşandı? – Hökuməti hərəkətə keçirən hadisə

Son illərin ən dəhşətli meşə yanğını fəlakəti ilə mübarizə aparan İspaniyada yanğınların arealı 115 min hektar əraziyə qədər genişlənib. Ocaqların sayı isə 20-yə çatıb.

Hökumət meşə yanğınları ilə mübarizəni dəstəkləmək üçün əlavə 500 əsgər göndərib. Bununla da meşə yanğınları ilə mübarizəyə göndərilən əsgərlərin sayı ölkə üzrə təxminən 1900-ə çatıb.

Yayın əvvəlindən meşə yanğınlarının başlamasında şübhəli bilinən 27 nəfər həbs edilib, daha 92 nəfərə qarşı isə araşdırmalara başlanılıb.

İspaniyanın Daxili İşlər Nazirliyindən bildirilib ki, bu, iyunun 1-dən, meşə yanğınları ilə mübarizə üzrə milli kampaniyanın başlamasından avqustun 16-dək olan dövrü əhatə edir.

Son məlumatlara görə, hökumət yanğınların söndürülməsinə kömək etmək üçün Niderlanddan təyyarələrin gəlməsini gözləyir. Qalisiya ilə yanaşı, Kastiliya, Leon, Ekstremadur və Asturiya bölgələri də meşə yanğınlarından ən çox zərər çəkənlər sırasındadır. Çətin vəziyyətə baxmayaraq, hakimiyyət hələ də ölkədə fövqəladə vəziyyət elan etməyib.