İsrail yenidən Yəmənə ağır zərbələr endirdi | “Husilərə hücumumuzu davam etdirəcəyik”

İsrailin Yəmənə endirdiyi hava zərbələri nəticəsində ölənlərin sayı artıb.

Bu barədə husilərin Səhiyyə Nazirliyi məlumat yayıb.

"İsrailin təcavüzü nəticəsində paytaxt Səna və Əl-Cauf əyalətində 35 nəfər ölüb, 118 nəfər yaralanıb", – məlumatda belə deyilir.

Öz növbəsində, "Ənsar Allah" hərəkatından olan husilərin silahlı qüvvələrinin sözçüsü Yəhya Sariya bildirib ki, İsrail Yəməndəki hava hücumları zamanı yalnız mülki hədəflərə, o cümlədən Sənadakı iki qəzetin ofisinə hücum edib.

İsrailin Baş naziri Benyamin Netanyahu isə açıqlamasında bildirib ki, İsrail Yəməndəki husi üsyançılarının hədəflərinə hücumlarını davam etdirəcək.

O xatırladıb ki, bir neçə gün əvvəl İsrail Sənaya endirdiyi zərbələr nəticəsində Yəmənin şərqinə nəzarət edən husi hökumətinin üzvlərinin əksəriyyəti həlak olub. Buna cavab olaraq sentyabrın 8-də husilər İsrailin cənubundakı Eylat şəhəri yaxınlığındakı Ramon hava limanına pilotsuz uçan aparatla hücum ediblər və burada bir neçə nəfər yaralanıb.

"Bu gün biz onların obyektlərinə, çoxlu sayda terrorçunun olduğu bazalara, eləcə də digər hədəflərə yenidən hava zərbələri endirdik. Zərbələrimizi davam etdirəcəyik", – deyə Netanyahu bildirib.