İsrailin 2-ci mahnısı da Avroviziyada qəbul edilmədi

Avroviziya mahnı müsabiqəsinin təşkilatçısı İsrailin təqdim etdiyi ikinci mahnını da siyasi motivli olması səbəbindən rədd edib.

Ölkənin Xarici İşlər Nazirliyinin yaydığı məlumata görə, qərar “Dance Forever” yəni “Ömürlük rəqs” adlı musiqi parçasına aiddir.

Məlum olub ki, bundan əvvəl Avropa Yayım Birliyinə təqdim edilən “October rain” yəni “Oktyabr yağışı” adlı mahnıda olduğu kimi, 2-ci musiqinin sözlərində də oktyabrın 7-də İsrail və HƏMAS arasında başlayan münaqişə barəsində siyasi motivlər öz əksini tapıb.

Qeyd edək ki, qurum siyasi mesajların istifadə olunduğu musiqinin sözlərində dəyişiklik edilməsi üçün İsrailə müraciət ünvanlayıb. Lakin İsrail Avropa Yayım Birliyinə təqdim etdiyi mahnının melodiya və sözlərində dəyişiklik etməkdən qəti şəkildə imtina edib. Bu səbəbdən də musiqi yayım birliyi tərəfindən rədd edilib.

Məlumat üçün bildirək ki, yarışma 7-11 may tarixləri arasında İsveçdə baş tutacaq. Əgər İsrail müsabiqə tərəfindən qəbul edilən bir mahnı təqdim etməsə, ölkə yarışmada iştirak üçün yararsız hesab olunacaq.

Xatırladaq ki, bundan əvvəl İsrail Prezidenti İsaak Hersoq ölkəsinin yarışmada iştirakının vacib olduğunu vurğulayıb. İnsanların etirazına və boykot təşviqinə baxmayaraq, rəsmi Tel-Əviv müsabiqədə iştirak edəcəyini bildirib.