İsrailli azarkeşlərə qarşı dəhşətli hücum | Hadisə yerindən görüntülər

Niderland polisi Amsterdam şəhərində yerli "Ayaks" və Təl-Əvivin "Makkabi" komandaları arasında keçirilən futbol oyunu zamanı baş verən iğtişaşlarla bağlı 57 nəfəri həbs edib.

Bu barədə qurumun saytında dərc edilən bəyanatda bildirilib.

Məlumata görə, həbslər hələ oyundan əvvəl, "Makkabi"nin bir neçə yüz azarkeşi Dam meydanı ətrafında toplaşanda başlayıb. O zaman hüquq-mühafizə orqanları ictimai asayişin pozulması da daxil olmaqla müxtəlif hüquqpozmalara görə təxminən 10 nəfəri saxlayıb.

Qurum xatırladıb ki, "Makkabi" oyunçularının gəlişinə qarşı əvvəlcədən elan edilmiş etiraz aksiyası bu fonda başqa yerə – Anton de Kompleyn meydanına köçürülüb. Nümayişçilərin bir hissəsi oradan stadiona keçmək cəhdi göstərib, bundan sonra polislə toqquşmalar başlayıb.

Hadisə nəticəsində bir polis əməkdaşı xəsarət alıb. Krallıq polisinin məlumatına görə, ümumilikdə 57 nəfər həbs edilib, onların əksəriyyəti ictimai asayişi pozduğuna görə saxlanılıb.

Son məlumatlara görə, Amsterdamın müxtəlif rayonlarında "Makkabi" futbol klubunun İsrail azarkeşlərinə qarşı bir sıra hücumları nəticəsində 10 nəfər xəsarət alıb.