Kobaxidze söz verdi | Gürcüstan və Almaniya arasında nə baş verir?

"Gürcüstanda inqilab təşkil etməyin qeyri-mümkün olduğunu hər kəs gördü".

Bunu Gürcüstanın Baş naziri İrakli Kobaxidze jurnalistlərə açıqlamasında deyib.

Hökumət başçısı Gürcüstanda vəziyyətin sabit qalacağına, ölkədə sülhün qorunub saxlanılacağına əminliyini ifadə edib.

İrakli Kobaxidze sanksiyalarla bağlı səsləndirilən bəyanatları isə qeyri-ciddi adlandırıb:

“Sanksiyalara dair söhbətləri qeyri-ciddi hesab edirik. Bununla bağlı bəyanat verənlər də qeyri-məhsuldar insanlardırlar. “Xarici təsirin şəffaflığı haqqında” qanunun qəbul edilməsinə səs verən deputatlara qarşı sanksiyaların tətbiq olunacağı ilə bağlı bildirişlərin göndərilməsi xəbəri də şayiədir və həqiqəti əks etdirmir”.

Jurnalistlərin suallarını cavablandıran Baş nazir Almaniyanın Gürcüstandakı səfiri Peter Fişeri Tbilisi-Berlin əlaqələrini zədələməyə çalışmaqda ittiham edib. İrakli Kobaxidze həmçinin bildirib ki, Almaniya Gürcüstanın dostu və tərəfdaş ölkədir. Heç bir səfir bu ənənəvi dostluğu və tərəfdaşlığı poza bilməz.

“Hazırkı səfir buna çalışır. Nəticə etibarilə o buna nail ola bilməyəcək”, – deyə Baş nazir əlavə edib.

İ.Kobaxidze qeyd edib ki, Peter Fişer Almaniya Kansleri Olaf Şoltsun fikirlərinin guya Gürcüstanın ünvanına səsləndirildiyini deməklə ölkəsinin nüfuzuna bilərəkdən xələl gətirməyə çalışır.

Qeyd edək ki, almaniyalı hökumət başçısı Olaf Şolts iyunun 2-də öz çıxışlarının birində bildirmişdi ki, bugünlərdə siyasi motivli düşmənçilik halları və hücumlar artmaqdadır: “Nifrət və zorakılığa qarşı tolerant ola bilmərik. Ləyaqətli insanların səsi eşidilməlidir”.

Bu fikirlərin Gürcüstanda etiraz dalğalarının baş qaldırdığı bir faktda səsləndirilməsi isə birmənalı qarşılanmayıb.