Koçaryan “sudan quru çıxmaq” üçün Sarkisyanı satacaq?

Ermənistanın üçüncü prezidenti Robert Koçaryan Serj Sarkisyana qarşı açılmış cinayət işi üzrə şahid qismində çıxış edir.

Bu barədə məhkəmə iclasında prokuror Qorik Ovakimyan məlumat verib.

Hadisə Yerablur hərbi panteonunun yaxınlığındakı torpaq sahələrinin Koçaryanın prezident, Sarkisyanın isə müdafiə naziri olduğu dövrdə özəlləşdirilməsi ilə bağlıdır. Bu, iki şəxsin hələ o vaxtdan ortaq olduğuna dair növbəti faktdır.

Ümumiyyətlə, 2018-ci ildə Paşinyan hakimiyyətə gəldikdən sonra keçmiş prezidentlər arasında "soyuq yellər" əsməyə başlayıb. Buna görə də ola bilər ki, Koçaryan sudan quru çıxmaq üçün Sarkisyanı satsın. Əgər bu baş verərsə, Ermənistan müxalifətində parçalanma sürətlənəcək.

Seçki öncəsi baş verən bu hadisə Paşinyana sərf edir. Ermənistan iqtidarının əsas məqsədi 2026-cı ildə keçiriləcək parlament seçkilərində müxalifətin birləşməsinə imkan verməməkdir. Paşinyan hökuməti son zamanlar Rusiyaya bağlı olan siyasətçiləri nüfuzdan salır. Əsas məqsəd onları siyasi səhnədən tamamilə uzaqlaşdırmaqdır.

Deməli, Rusiyanın Ermənistanda olan nüfuzundan əsər-əlamət qalmayıb. Ermənistan siyasətində istər iqtidar, istərsə də müxalifətin içində Qərbə bağlı fiqurlar güclənməkdədir. Rusiyanın isə ardıcıl şəkildə Koçaryanı dəstəkləməsi onu göstərir ki, İrəvanda Moskvaya sadiq ermənilər barmaqla sayılacaq qədərdir. Gümrü merinin də həbs olunması Rusiyanın Paşinyana təzyiq rıçaqlarını azaldır.

Sarkisyanın Qərb ölkələrinin siyasi dairələri ilə də müəyyən danışıqlar aparması Kremli Serjdən də uzaqlaşdırır. Nəticədə Ermənistanın “Qarabağ klanı” zəifləyir, Paşinyanın "Vətəndaş müqaviləsi" güclənir.