Kosmosda elə bir partlayış olacaq ki... | Rusiyalı astronomdan xəbərdarlıq

Bir neçə ildən sonra “2024 YR4” asteroidinin Ayla toqquşması səkkiz meqaton gücündə partlayışa səbəb ola bilər ki, bu da səma cisminin qalıqlarının Yerə yağmasına gətirib çıxarar.

Rusiyalı astronom Leonid Yelenin bildirib ki, asteroidin dəqiq trayektoriyası yalnız 2028-ci ildə məlum olacaq:

“Hazırda asteroidin Ayla toqquşma ehtimalı təxminən bir faiz civarındadır, lakin bu göstərici də azalır. Bununla belə, bu cür toqquşma Yer üçün təhlükəli ola bilər, çünki güclü partlayış baş verəcək və enerji buraxılışı təxminən səkkiz meqaton təşkil edəcək. Ayın atmosferi yoxdur və onun cazibə qüvvəsi zəifdir, buna görə də, partlayış nəticəsində kosmosa atılan qalıqların bir hissəsi sonda Yerə düşə bilər”.

Asteroidin Yerə çırpılma ehtimalı ilə bağlı proqnozların dəyişməsinə toxunan alim qeyd edib ki, bu hesablamalar daim yenilənir.

“Proses heç vaxt dayanmır. Günəş sistemində orbitlər bir dəfə müəyyən olunmuş dəmir yolları kimi sabit deyil. Onlar daim dəyişir və cisim nə qədər kiçik, eləcə də yüngül olarsa, planetlərin cazibə qüvvəsinin ona təsiri bir o qədər də çox olar”, – deyə L.Yelenin vurğulayıb.