Kral III Çarlz qardaşını saraydan qovub

Böyük Britaniya Kralı III Çarlz hüquq müdafiəçisi Virciniya Cuffrenin cinsi istismara məruz qalması iddialarına görə kiçik qardaşı şahzadə Endryunu Bukingem sarayından qovub.

Bu barədə “The Sun” özəl mənbəyə istinadən məlumat yayıb. Nəşrin yazdığına görə, şahzadə daha krallıq öhdəliklərini yerinə yetirmir. Şahzadə Endryunun silahlı mühafizədən də məhrum edildiyi qeyd olunur.

Buna baxmayaraq, şahzadə Endryu Milad bayramını kral ailəsinin digər üzvləri ilə Sandringem sarayında qeyd etməyi planlaşdırır. Şənlikdə onun keçmiş həyat yoldaşı Sara Ferqüsonun, həmçinin qızları Beatris və Eujeniya, onların ərləri və uşaqlarının da iştirak edəcəyi gözlənilir.

Xatırladaq ki, şahzadə Endryu 2020-ci ilin may ayında yetkinlik yaşına çatmayanlara qarşı cinsi zorakılıqda ittiham olunan Cefri Epşteynlə yaxın münasibəti ictimailəşdikdən sonra krallıq titullarından və vəzifələrindən məhrum edilib. Hüquq müdafiəçisi Virciniya Cuffre kral ailəsinin üzvünü məhkəməyə verərək onu cinsi təcavüzdə ittiham edib. II Elizabetin oğlu ona 12 milyon avro təzminat ödəyib.