Əlverişsiz hava Avropada hərəkəti iflic etdi

Qərbi Avropada əlverişsiz hava səbəbindən aviareyslər ləğv olunub, dəmir yolu əlaqəsi pozulub və avtomobil qəzalarının sayı kəskin artıb.

Məlumata görə, Fransa və Belçikada yüzlərlə reys ləğv edilib, sərnişinlər hava limanlarında qalıblar. Parisdə və ətraf bölgələrdə avtobusların fəaliyyəti dayandırılıb. Paytaxt sakinlərinə və ətraf bölgələrdə yaşayan insanlara lazımsız səfərlərdən çəkinmək və evdən işləmək tövsiyə olunub.

Böyük Britaniyada Kornuoll, Devon və Silli adaları üçün “Goretti” qasırğası ilə əlaqədar sarı xəbərdarlıq elan olunub.

Sürücülərə yollarda təhlükəli vəziyyətlə bağlı çağırış edilib. Bildirilib ki, İngiltərədə soyuq hava şəraiti həftənin sonuna qədər davam edəcək.

Avropanın ən böyük hava limanlarından biri olan Amsterdam Sxiphol Hava Limanı isə azı 700 reysin ləğv olunduğunu, minlərlə sərnişinin gecəni hava limanında keçirdiyini açıqlayıb.

Skandinaviya ölkələri də qar yağışı ilə bağlı xaosla üzləşib. İsveçin şərqində hakimiyyət güclü qar səbəbindən elektrik təchizatında problemlərin yaşanacağı ilə bağlı elan verib. Ölkənin qərbində isə tramvayların hərəkəti dayandırılıb.

“Reuters”in məlumatına görə, son dörd gün ərzində Fransada beş nəfər, Bosniya və Herseqovinada isə bir qadın həlak olub. Güclü qar və yağışlar Balkanlarda daşqınlara və elektrik təchizatında pozuntulara gətirib çıxarıb.