Lvov şəhərində 50 min abonent susuz qaldı

Ukraynanın qərbindəki Lvov şəhərində magistral kəmərdə baş verən qəza səbəbindən təxminən 50 min abonent susuz qalıb.

Bu barədə şəhər merinin birinci müavini Andrey Moskalenko "Facebook" hesabında yazıb.

O qeyd edib ki, qəza köhnə borular səbəbindən baş verib.

Meriya rəsmisi vurğulayıb ki, köhnəlmiş boruların hamısının dəyişdirilməsi üçün təxminən 238,7 milyon dollar tələb olunur ki, bu da şəhər büdcəsində nəzərdə tutulmayıb.

Şəhər Su İdarəsinin məlumatına görə, bu, son onillikdə baş verən ən böyük qəzadır. Əvvəlcə, Domajir kəndində əsas su kəməri zədələnib və Lvov yaxınlığındakı 13 kənd, eləcə də vilayət mərkəzində bir neçə küçə susuz qalıb. Təmirdən sonra bəzi kəndlər su ilə təmin olunsa da, daha bir neçə qəza baş verib.

Oktyabrın 25-i səhər saatlarında kommunal xidmət işçiləri daha bir təmiri başa çatdırıb, 30 kilometrdən çox magistral xətti və böyük su anbarlarını tamamilə boşaldan qəzadan sonra tədricən suyun doldurulmasına başlayıblar. Lakin bu proses zamanı Domajir kəndi yaxınlığında başqa bir magistral su kəməri partlayıb və nasos stansiyalarında təzyiqin düşməsinə səbəb olub.

Kommunal xidmət işçiləri məlumat veriblər ki, mərkəzləşdirilmiş su təchizatı bərpa olunana qədər su maşınları fəaliyyətini davam etdirəcək.