Mariya Zaxarovadan Serbiyadakı İğtişaşlarla bağlı açıqlama

“Belqraddakı iğtişaşların arxasında Qərb dayanır”.

Belə bir açıqlama ilə Rusiya Xarici İşlər Nazirliyinin sözçüsü Mariya Zaxarova çıxış edib. Bildirib ki, Qərbin “Maydan çevrilişləri” üsulundan istifadə edərək ölkədəki vəziyyəti qarışdırmağa cəhd etdiyi göz qabağındadır.

M.Zaxarova vurğulayıb ki, vəziyyətə yeganə nəzarət yolu konstitusiyaya ciddi riayət etmək, milli maraqlara səs verən serb xalqının seçiminə hörmət etməkdir.

Qeyd edək ki, dekabrın 17-də keçirilən seçkilərin nəticələri ilə razılaşmayan ölkənin müxalifət blokunun tərəfdarları Belqrad administrasiyasına hücum edib, binanın şüşələrini sındıraraq içəri keçməyə cəhd ediblər. Etirazçıları dağıtmaq üçün polis gözyaşardıcı qazdan istifadə edib.

Xalqa müraciətində Serbiya Prezidenti Aleksandr Vuçiç bildirib ki, aksiyada iki polis əməkdaşı ağır yaralanıb, iğtişaşın 35-dən çox iştirakçısı saxlanılıb.

Onun sözlərinə görə, Belqradda keçirilən etiraz aksiyaları Serbiyanı müstəqillik və suverenliyindən məhrum etmək cəhdidir. O, Serbiya hakimiyyətini gözlənilən hərəkətlərlə bağlı xəbərdar edən tərəfdaş ölkələrin kəşfiyyat xidmətlərinə təşəkkür edib.