Marsda mümkün su hövzələrinin harada ola biləcəyi aşkar edildi

ABŞ-nin Arizona Planetologiya İnstitutunun alimləri Marsın səthinin altında maye su axınları şəbəkəsinin mövcud ola biləcəyini və suyun donmuş torpağın içindən axa biləcəyini ehtimal ediblər.

Yeni hesablamalar göstərib ki, bu dar kanallar mikroorqanizmlərin həyatını dəstəkləmək üçün kifayət qədər miqyaslı ola bilər.

Bununla bağlı tədqiqatın nəticələri "Icarus" jurnalında dərc edilib.

"Biz həmişə Marsın potensial yaşayış üçün yararlılığı və yaşayış üçün tamamilə yararsızlığı arasında qalırıq. Biz sübut etmək istəyirdik ki, orada həyat üçün kifayət qədər su yoxdur, lakin yanıldıq", – deyə tədqiqatın aparıcı müəlliflərindən olan Hanna Sayzmor qeyd edib.

Tədqiqatçılar buzlu torpağın nə qədər hissəsinin maye halında qala biləcəyini və kanalların ölçüsünün nə qədər olacağını qiymətləndirmək üçün Mars torpağının tərkibi haqqında məlumatlardan istifadə ediblər. Marsda su adətən -150°C-yə qədər aşağı temperaturlarda donur. Lakin torpaqda duzların olması donma həddini aşağı salır və bu da suyun hətta ekstremal şəraitdə belə maye halında qalmasına imkan verir.

Sayzmor və həmkarları tərkibində 5%-dən çox su olan və diametri beş mikron olan kanalların kifayət qədər asanlıqla əmələ gələ biləcəyini aşkar ediblər. Alimlər izah ediblər ki, çox kiçik məkanlar mikrobların orada yaşaması və qida maddələrini daşıması üçün kifayətdir.

Alimlər bu qənaətə gəliblər ki, Marsın səthə yaxın təbəqələrində həyat mövcud ola bilər.