Məhkəmədə şok ittihamlar | "Meta" azyaşlılara görə görün nə qədər cərimələndi - Baku TV

ABŞ-nin Nyu-Meksiko ştatının məhkəməsi “Facebook” və “Instagram” sosial şəbəkələrinin sahibi “Meta” şirkətinə yetkinlik yaşına çatmayan istifadəçilərinin əqli sağlamlığına dəyən zərərə görə 567 milyon dollar ödəməsi barədə qərar çıxarıb.

“Reuters” və “Associated Press”in məlumatına görə, qərar şirkətə qarşı iddianın ikinci mərhələsinin bir hissəsi olaraq verilib. Ümumi məbləğin 420 milyon dollar uşaqlar və yeniyetmələr üçün psixoloji dəstək proqramlarının maliyyələşdirilməsinə sərf olunacaq. Qalan vəsait növbəti beş il ərzində informasiya kampaniyaları, profilaktika proqramları, risklərin müəyyən edilməsi xidmətləri və digər tədbirlər üçün ayrılıb.

Daha əvvəl məhkəmənin birinci mərhələsində hakimlər heyəti şirkətin platformalarının uşaqların əqli sağlamlığın mənfi təsirindən xəbərdar olduğunu və istifadəçiləri yetkinlik yaşına çatmayanları cinsi istismardan kifayət qədər qorumadığını müəyyən edərək “Meta” şirkətinin 375 milyon dollar cərimə ödəməsi barədə qərar çıxarıb.

Məhkəmə həmçinin “Meta” şirkətinə gənc istifadəçilər üçün əlavə təhlükəsizliyi tədbirləri tətbiq etməyi, o cümlədən yeniyetmələrin “Facebook” və “Instagram”dan istifadə vaxtını məhdudlaşdırmağa, bildirişlərə nəzarət, arzu olunmayan yetkinlərlə yetkinlik yaşına çatmayanların təmaslarına qarşı müdafiəni gücləndirməyi və süni intellekt çat botları üzərində əlavə nəzarəti həyata keçirməyi planlaşdırıb.

Nyu-Meksikonun baş prokuroru Raul Torres əvvəllər “Meta” şirkətini gənc istifadəçilərdə asılılıq yaradan xüsusiyyətlər formalaşdırmaqla və uşaqları öz platformalarında istismar olunmaqdan kifayət qədər qorumamaqda ittiham edib. “Meta” şirkəti zərərli məzmunu silmək və xidmətlərinin təhlükəsizliyini artırmaq üçün işlərini davam etdirdiyini vurğulayaraq məhkəmənin qərarından apelyasiya şikayəti vermək niyyətində olduğunu bildirib.