Minalardan təmizləmə üzrə işçi qrupun iclası keçirilib - Baku TV

Minalardan və partlamamış hərbi sursatlardan təmizləmə üzrə İşçi qrupun üzvləri Ağdam rayonuna səfər ediblər.

Onlar Ağdam rayonunun Cəvahirli, Mərzili və Qızılkəngərli kəndi ərazisində icra edilən humanitar minatəmizləmə əməliyyatları ilə ətraflı tanış olublar.

Sahə baxışları zamanı minatəmizləmə əməliyyatlarının təşkili, istifadə olunan texniki avadanlıqlar, sahələrdə mina və digər partlayıcı sursatlarla çirklənmə səviyyəsinə görə tətbiq edilən təmizləmə üsulları, eləcə də aşkar edilən partlayıcı sursatların partlayış yolu ilə zərərsizləşdirilməsi prosesi nümayiş olunub.

Ərazilərdə mövcud çətinliklər, çirklənmə səviyyəsi, habelə işğaldan azad edilən ərazilərə təhlükəsiz və dayanıqlı qayıdışın təminatı məqsədilə minatəmizləmə prosesi ilə yanaşı, icra edilən mina və digər partlayıcı sursatlarla yüksək səviyyədə çirklənən ərazilərin çəpərlənməsi fəaliyyəti barədə məlumat verilib.

Əməliyyat sahələrinə baxış prosesindən sonra İşçi qrupun Ağdam şəhərində iclası keçirilib.

Toplantıda bildirilib ki, ümumilikdə 264,581 hektar ərazidə minatəmizləmə fəaliyyəti aparılıb, nəticədə 248,583 ədəd mina və digər partlayıcı sursat aşkar edilib.

İclasda aidiyyəti qurumların koordinasiyalı fəaliyyəti, resursların səmərəli səfərbər olunması və minatəmizləmə əməliyyatlarının planlı şəkildə icrasının təhlükəsiz qayıdışın təminatında həlledici rol oynadığı vurğulanıb.