Moskvadakı terrorda İŞİD-in əli var? - Peskov açıqlama vermədi

Kreml ölüm hökmünə qoyulan moratoriumun ləğvi ilə bağlı müzakirələrdə iştirak etmir.

Bunu Rusiya Prezidentinin mətbuat katibi Dmitri Peskov deyib.

O həmçinin bildirib ki, Kreml "Crocus" terrorunun istintaqının gedişi ilə bağlı şərh verməyəcək. D.Peskovun sözlərinə görə, terror aktının araşdırılması ilə bağlı Qərb ölkələri ilə heç bir təmas yoxdur. O, Rusiya xüsusi xidmət orqanlarının terror aktı üzərində müstəqil işlədiyini, başqa ölkələrdən hər hansı yardımdan söhbət getmədiyini bildirib.

D.Peskov İŞİD qruplaşmasının "Crocus City Hall"dakı terror aktında əli olması ilə bağlı versiyanı isə şərh etməyib.

Kremlin sözçüsü Rusiya Prezidenti Vladimir Putinin Moskvada baş verən terror aktından sonra görülən tədbirləri müzakirə etmək üçün müşavirə keçirəcəyini də açıqlayıb.