Narkobaronun ölümü Meksikanı qarışdırdı | Səfirlik vətəndaşlarımıza müraciət - Baku TV

Meksikanın ən böyük cinayətkar qruplaşmalarından biri olan “Xalisko Yeni Nəsil” kartelinin lideri, “El Menço” ləqəbli Osequera Servantes hərbi əməliyyat nəticəsində öldürülüb.

Əməliyyatdan sonra kartel üzvləri ilə hüquq-mühafizə orqanları arasında silahlı qarşıdurma yaşanıb.

Meksika mediasının məlumatına görə, əməliyyat Xalisko ştatının Tapalpa şəhərində baş tutub. Dünyanın ən çox axtarılan narkotik qaçaqmalçılarından biri hesab edilən Osequeranın əməliyyat zamanı zərərsizləşdirildiyi bildirilir. Onun ölümü ilə bağlı hələlik rəsmi təsdiq olmasa da, şayiələr ölkə daxilində xaos yaratmaq üçün kifayət edib.

Qeyd edək ki, ABŞ hakimiyyəti Osequeranın tutulmasına gətirib çıxara biləcək hər hansı bir məlumata görə 15 milyon dollara qədər mükafat təyin etmişdi. Əməliyyatdan sonra qruplaşma üzvləri Xalisko və digər ştatlarda çoxsaylı nəqliyyat vasitələrini yandırıblar.

Təhlükəsizlik qüvvələri ilə kartel üzvləri arasında toqquşmalar baş verib. Xalisko qubernatoru Lemus Navarro silahlı qarşıdurmaların ən azı ştatın beş fərqli ərazisində baş verdiyini bildirərək əhalini vəziyyət nəzarət altına alınana qədər evdə qalmağa çağırıb. İctimai nəqliyyat xidmətləri müvəqqəti olaraq dayandırılıb.

Qeyd edək ki, Azərbaycanın Mexikodakı səfirliyi Meksikada davam edən iğtişaşlarla bağlı bu ölkədəki vətəndaşlarımıza müraciət edib. Müraciətdə vətəndaşlarımızdan ayıq-sayıq olmaları, şəxsi təhlükəsizlik qaydalarına əməl etmələri, kütləvi toplaşmalardan və riskli ərazilərdən uzaq durmaları, həmçinin yalnız rəsmi mənbələrdən yayımlanan məlumatları izləmələri xahiş olunur.