Növbəti qlobal enerji rəqabəti təkcə neft və qaz ehtiyatları ilə məhdudlaşmayacaq

Növbəti qlobal enerji rəqabəti təkcə neft və qaz ehtiyatları ilə məhdudlaşmayacaq, bu mübarizənin nəticəsini süni intellekt (Sİ) sahəsində üstünlük əldə edən ölkə müəyyən edəcək.

Bu barədə Amerika Neft İnstitutunun (API) prezidenti Mayk Sommers "FOX Business" telekanalına müsahibəsində bildirib.

M.Sommersin sözlərinə görə, süni intellekt texnologiyalarının sürətli inkişafı elektrik enerjisinə tələbatı kəskin artırır və bu da enerji infrastrukturunu ABŞ-nin iqtisadiyyatı və milli təhlükəsizliyi üçün strateji əhəmiyyətli sahəyə çevirir. O vurğulayıb ki, qarşıdakı mərhələdə enerji təminatı süni intellekt yarışında həlledici rol oynayacaq.

API prezidenti qeyd edib ki, Tramp administrasiyası 2025-ci il ərzində energetika sahəsində qarşıya qoyulan hədəflərin təxminən 90 faizinə nail olub.

Onun sözlərinə görə, bundan sonrakı mərhələ süni intellektlə bağlıdır və ABŞ təkcə ən sürətli və effektiv Sİ sistemlərini yaratmaqla kifayətlənməməli, eyni zamanda bu texnologiyaları enerji sektorunun səmərəliliyini artırmaq üçün tətbiq etməlidir.

M.Sommers bildirib ki, növbəti 15 il ərzində enerji tələbatının təxminən 50 faiz artacağı gözlənilir. Bu isə gələcəkdə bütün enerji mənbələrindən istifadəni zəruri edəcək. Lakin o, xüsusilə təbii qazın əhəmiyyətini vurğulayıb və onu ABŞ-nin müasir elektroenergetika sisteminin əsas dayağı adlandırıb.

Ekspertin fikrincə, süni intellekt dövrünə uyğunlaşmaq üçün ABŞ genişmiqyaslı və dayanıqlı enerji infrastrukturu formalaşdırmalıdır. O bildirib ki, enerji təminatı olmadan süni intellekt sahəsində üstünlük əldə etmək mümkün deyil.

API prezidenti hesab edir ki, ABŞ-nin gələcək enerji təhlükəsizliyini və süni intellekt sahəsində liderliyini təmin etmək üçün davamlı institusional və texnoloji islahatlar həyata keçirilməlidir.