Onkoloji xəstə işdən niyə çıxarıldı? - "5 ay maaşımı kəsdi, deyir ki, yaxşı etmişəm" - Baku TV

Əslən Füzuli rayonundan olan Teyyubə İbişova onkoloji xəstədir. O, məcburi köçkün kimi uzun illər Bakıda yaşayıb və Seyid Şuşinski adına 1 nömrəli Uşaq İncəsənət Məktəbində nəzarətçi vəzifəsində çalışıb. 4 il əvvəl isə Horadizdə fəaliyyət göstərən Füzuli Tarix-Diyarşünaslıq Muzeyinə nəzarətçi kimi köçürülüb.

Onun sözlərinə görə, bir müddət tanışının evində qalaraq işə gedib-gəlsə də, sonradan həm səhhətinə görə, həm də orada evi olmadığı üçün Bakıya qayıdıb.

Paytaxtdakı iş yerinə qaytarılmasını xahiş edən Teyyubə İbişova xəbər tutub ki, muzeyə 4-5 ay əvvəl direktor təyin olunan Nailə adlı şəxs onu işdən azad edib. Teyyubə xanım deyir ki, bu proses onun xəbəri olmadan aparılıb:

“Mənə dedi, gəl Horadizdə işlə, amma bildirdim ki, 350 manat maaş alıram, kirayə evlərin qiyməti isə 400-500 manatdır. Bu maaşla necə gəlib orada kirayədə qalım? İşdən çıxarma məsələsində də deyir ki, yaxşı etmişəm, mən buyam, sizi adam saymıram”.

Şikayətçi məsələ ilə bağlı Mədəniyyət Nazirliyinə də müraciət etdiyini deyir. Onun sözlərinə görə, qurumdan iş yerinə ağır xəstəliyi nəzərə alınaraq işdən çıxarılmaması bildirilib.

Daha bir iddia isə əməkhaqqı ilə bağlıdır. Teyyubə İbişova vurğulayır ki, son 5 aylıq maaşı ona verilməyib. 30 ildən artıq iş stajı olmasına baxmayaraq, ona çıxarılarkən cəmi 143 manat kompensasiya yazılıb.

Məsələ ilə bağlı Füzuli Tarix-Diyarşünaslıq muzeyinin direktoru olduğunu deyən Nailə adlı şəxs qeyd edib ki, səsləndirilən iddialar əsasızdır. Teyyubə İbişova uzun müddət işə gəlmədiyi və xəstəliyi ilə əlaqədar hər hansı sənəd təqdim etmədiyi üçün işdən azad edilib.

Qarabağ Regional Mədəniyət İdarəsindən verilən məlumata görə, mövcud vəziyyət uzun müddət ərzində diqqətlə araşdırılıb. Məsələ ilə bağlı müvafiq aktlar tərtib edilib, əməkdaşa rəsmi xəbərdarlıqlar edilib, izahat verməsi üçün şərait yaradılıb və alternativ iş imkanları təklif olunub. Bütün bu mərhələlərdən sonra məsələ həmkarlar ittifaqı orqanlarında müzakirə edilib və nəticədə Əmək Məcəlləsinin 70-ci maddəsinin “ç” bəndinə uyğun olaraq əmək müqaviləsinə xitam verilib. Son haqq-hesab isə qanunvericiliyə uyğun qaydada təmin edilib.