Pakistanda yağan qar fəsadlarla nəticələndi - Baku TV

Pakistanın iki şimal vilayətində qar və leysan yağışları nəticəsində beş nəfər ölüb.

Polisin məlumatına görə, Tanqir vadisində yaşayış evinin yaxınlığındakı müşahidə qülləsi evin üzərinə çöküb. Bu zaman bir ailənin dörd üzvü həlak olub, daha iki nəfər yaralanıb. Qeyd olunub ki, xilasetmə əməliyyatı davam etdiyi üçün qurbanların sayı arta bilər.

Soyuq hava səbəbindən Gilgit-Baltistanda yollar bağlanıb və elektrik təchizatında fasilələr yaranıb. Cob şəhərində isə bir uşaq damın uçması nəticəsində ölüb, iki nəfər xəsarət alıb.

Yaponiyanın qərb sahilindəki İşikava prefekturasında isə qar yağışı nəticəsində 13 nəfər xəsarət alıb. Vurğulanıb ki, prefekturanın paytaxtı Kanazavada qarın hündürlüyü təxminən 50 santimetrə çatıb.

Məlumata görə, son 24 saat ərzində prefekturada buzlu yollarda qar yığınları səbəbindən 32 yol-nəqliyyat hadisəsi baş verib, nəticədə, doqquz nəfər xəsarət alıb, qarda yıxılma nəticəsində isə dörd nəfər xəstəxanalara müraciət edib.

İndoneziya hakimiyyəti Qərbi Yava vilayətinin yaşayış məhəlləsində baş verən sürüşmə nəticəsində 10 nəfərin həlak olduğu, 80 nəfərin isə itkin düşdüyü hadisə ilə bağlı axtarış-xilasetmə tədbirlərini bərpa edib.

Xatırladaq ki, baş verən sürüşmə bir müddət öncə başlayan leysan yağışları səbəbindən yaranıb. Meteorologiya agentliyi bildirib ki, yağıntılar həm vilayətdə, həm də ölkənin digər bölgələrində bir həftə ərzində davam edə bilər.