Qalmaqallı qanun layihəsinin detalları | Papuaşvilidən açıqlama

Gürcüstan parlamentinin sədri Şalva Papuaşvili “Xarici təsirin şəffaflığı haqqında” qanunu imzalayıb.

Bu barədə məlumatı ölkə parlamenti yayıb. Bununla da Gürcüstanda mübahisəli qanun layihəsi qüvvəyə minib.

Spiker Şalva Papuaşvili açıqlamasında bildirib ki, sənədin əsas məqsədi Gürcüstanın siyasi, iqtisadi və sosial sistemlərinin xarici müdaxilələrə qarşı dayanıqlılığını gücləndirməkdir:

“Qanun layihəsini imzaladım. Qanunun yanaşması sadə və aydındır. Qeyri-hökumət təşkilatları və media xarici hökumətlərin maliyyəsi ilə qərarların qəbulu prosesində iştirak etmək və gürcü xalqının həyatına təsir etmək istəyirsə, minimum şəffaflıq standartına cavab verməlidir. Əhali hər bir aktorun arxasında kimin, hansı qüvvələrin dayandığını bilməlidir”.

Məlumat üçün bildirək ki, bundan sonra Ədliyyə Nazirliyi və Milli Dövlət Reyestri Agentliyinə “xarici dövlətin maraqlarını daşıyan təşkilatların” reyestri üçün portal yaratmaqla bağlı 60 gün vaxt veriləcək. Bu mərhələ başa çatdıqdan sonra reyestrdə qeydiyyatdan keçmək qeyri-hökumət təşkilatlarının və onlayn medianın böyük bir hissəsi üçün məcburi olacaq.

Sözügedən məsələ ilə bağlı Gürcüstanın Baş naziri İrakli Kobaxidze də münasibət bildirib. Qeyd edib ki, “Xarici təsirin şəffaflığı haqqında” qanunun qəbul edilməsi nə hakimiyyətin qələbəsi, nə də opponentlərin və beynəlxalq tərəfdaşların məğlubiyyəti hesab edilməlidir.

Hökumət rəhbərinin sözlərinə görə, sənədin qəbulu ilə yalnız Gürcüstan qalib gəlib. Baş nazir bildirib ki, indi qanun qüvvədədir və hamı soyuqqanlılıqla praqmatik hərəkət etməli və lazımsız emosiyaları bir kənara qoymalıdır.