Qərb Çindən niyə çəkinir? - Si Cinpinin görüşlərinin pərdəarxası

Çin sədri Si Cinpinin Avropaya səfəri başlayıb.

Səfərdə əsas məsələ Çin iqtisadiyyatı üçün mühüm əhəmiyyət kəsb edən “Bir kəmər, bir yol” layihəsidir. Cinpinin ziyarət etdiyi ölkələrin hər üçü – Fransa, Serbiya və Macarıstan bu layihəyə dəstək verir.

Çin lideri Parisdə Fransa Prezidenti Emmanuel Makronla yanaşı, Avropa Komissiyasının prezidenti Ursula fon der Lyayenlə görüşüb.

Görüşdə əsas müzakirə mövzusu Avropanı illərdir narahat edən Çinin ticarət siyasəti olub. Məsələ burasındadır ki, Çin hökuməti istehsal etdiyi əksər mallara subsidiya ayırır. Həmin mallar Avropaya ixrac edilir və burada yerli məhsullardan ucuz qiymətə satılır. Nəticədə Avropa və ABŞ malları bazarda rəqabətə tab gətirə bilmirlər.

Görüş zamanı Çin və Fransa dövlət başçıları bir sıra beynəlxalq məsələləri də müzakirə ediblər. Yaxın Şərq məsələsində tərəflər arasında elə də ciddi fikir ayrılığı yoxdur. Hər iki tərəf İsrail-Fələstin və İran-İsrail məsələsinin sülh yolu ilə həll edilməsini dəstəkləyirlər.

Rusiya-Ukrayna müharibəsi ilə bağlı mövzuda isə Çinlə Qərb dövlətləri arasında fikir ayrılığı var. Avropa liderləri Çini öz nüfuzundan istifadə edərək Rusiyaya təsir etməyə çağırsalar da, rəsmi Pekin qarışmamaq siyasətinə üstünlük verir.