Qərbin Gürcüstanla bağlı planı | Seçki öncəsi siyasi gərginlik pik həddə

Gürcüstanda seçkilərə sayılı günlər qalmış daxili siyasi vəziyyət gərginləşməkdə davam edir.

Reytinq siyahılarında hazırda iqtidarda olan “Gürcü Arzusu” Partiyasının gerisində qalan müxalifət partiyaları Qərbin dəstəyi ilə ölkədə inqilab etmək niyyətindədir.

Prezident Salome Zurabişvili səhnədəki boşluqdan istifadə etmək qərarına gəlib. “Gürcü Arzusu”nun dəstəyi ilə prezident kürsüsünə yiyələnib daha sonra onlara xilaf çıxan xanım Prezident keçmiş müttəfiqlərinin devrilməsi üçün var-qüvvəsini ortaya qoyub.

Bir müddət əvvəl seçki sonrası bütün müxalifətin təmsil olunacağı müvəqqəti keçid hökuməti layihəsini irəli sürən S.Zurabişvili indi də “Avropaya yürüş” aksiyası təşkil edib. Bu məsələ ona qərbmeyilli müxalifətdən ciddi dəstək gəlib.

Seçkiyə bir neçə gün qalmış gürcü müxalifəti və Prezidentin Avropa sevgisinin ortaya qoyulmasının iki səbəbi var. Birincisi, onlar Qərbə göstərmək istəyirlər ki, əgər siz Gürcüstanı əldə etmək istəyirsinizsə, bizə dəstək verin. Biz Rusiyaya qarşıyıq və sizin yanınızda yer alacağıq. İkincisi, gürcü xalqına göstərmək istəyirlər ki, müxalifətin məqsədi ölkəni Avropaya aparmaqdır.

Bu, ölkə əhalisinin mühüm hissəsi, əsasən də gənclərə təsir etmək üçün düşünülmüş plandır. Çünki Gürcüstanda gənclərin böyük əksəriyyəti, əsasən də ali məktəb tələbələri ölkənin Avropaya inteqrasiyasını ciddi şəkildə müdafiə edirlər.

"Xarici agentlər haqqında" Qanunun qəbulunun əleyhinə keçirilən mitinqlərdə əsas lokomotiv qüvvə də məhz tələbələr idi. S.Zurabişvili və müxalifət həmin gəncləri yenidən meydana çıxarmaq istəyir. Lakin burada bir qədər müəmma var.

Gürcü xalqı ölkənin Avropaya inteqrasiyası siyasətini dəstəkləsə də, Gürcüstanın Rusiya ilə tamamilə qarşı-qarşıya gəlməsini və yeni müharibənin baş verməsini istəmir. Bu da aydın məsələdir ki, Qərbin özünə sadiq şəxsləri hakimiyyətə gətirərkən onlardan ilk tələbi məhz Rusiyaya qarşı ikinci cəbhə açmaqla bağlı olacaq.

Digər məsələ isə prosesə rəhbərlik edən Salome Zurabişvilinin özünün şəxsiyyəti ilə bağlıdır. Onun Qərb ölkələri, xüsusilə də Fransaya çox bağlı olduğu bilinir. Həmçinin xanım Prezidentin ölkədə o qədər də nüfuzu yoxdur. O məhz “Gürcü Arzusu”nun dəstəyi ilə öncə deputat, daha sonra isə prezident seçilib.

Anlaşılan budur ki, Qərb Gürcüstanı, S.Zurabişvili isə prezidentliyi əldən vermək istəmir. Gürcü xalqının bu yolla Avropaya gedəcəyi isə şübhəlidir. Təcrübə göstərir ki, bu yol istənilən ölkəni ancaq fəlakətə aparır, nəinki tərəqqiyə və ya Avropaya.