Qolunu itirən 19 yaşlı qızın texnologiya ilə bərpa olunmuş həyatı

19 yaşlı “Instagram” fenomeni Tilli Loki artıq on ilə yaxındır ki, Birləşmiş Krallıqda yerləşən “Open Bionics” robot texnologiyaları şirkəti ilə əməkdaşlıq edir.

İndi isə o, şirkətin son texnologiya ilə hazırlanmış yeni bioprotez qolunun sahibidir.

“Bu, inanılmaz dərəcədə həssasdır, çox sürətlidir, güclüdür, o qədər güclüdür ki, mən belə gücə öyrəşməmişəm”, – Tilli Loki “Reuters”ə müsahibəsində deyib.

Uşaqlıqda meningit xəstəliyi nəticəsində hər iki əlini itirən T.Lokinin “Open Bionics” ilə hekayəsi onun “Hero Arm” adlı bioprotez qolları geyinməsi ilə başlayıb. Bu qollar 2 tərəfli amputasiya olunmuş biri üçün əvvəllər mümkün olmayan funksionallığı təqdim edib.

T.Lokinin indi istifadə etdiyi “Hero PRO” prototipləri isə ona daha çox güc və çeviklik təqdim edir. Məsələn, əlini naqilsiz sensorlarla uzaqdan idarə edə bilir.

Yeni təqdim edilən “Hero PRO” modeli istifadəçilərə naqilsiz bağlantı, təkmilləşdirilmiş bilək fırlanması və daha yüksək incəlik səviyyəsi təqdim edir. “Hero RGD” adlı möhkəmləndirilmiş model isə çətin mühitlər üçün nəzərdə tutulub, davamlılıq və dəqiqlik tələb edən tapşırıqlarda istifadəyə uyğundur.