"Böyük tullantı ləkəsi" getdikcə genişlənir? | Alimlər həyəcan təbili çaldı

Niderland ekoloqları Sakit okeanda “Böyük tullantı ləkəsi” ərazisində plastik parçaların sayının kəskin artdığını bildiriblər.

Son yeddi ildə bu regionda plastikin həcmi təxminən beş dəfə artıb. Yeni tullantıların təxminən 74-96 faizi axınlar vasitəsilə dünya okeanlarının digər hissələrindən cəmləşir.

Alimlərin fikrincə, hər il təxminən 300 milyon ton plastik dünya okeanına daxil olur ki, onların da əksəriyyəti praktiki olaraq parçalanmır və onilliklər ərzində saxlanılır. Zaman keçdikcə bu tullantılar şimalda 35 və 42-ci enliklər arasında yerləşən “Böyük tullantı ləkəsi” kimi böyük ərazilərə toplanır.

Yeni tullantıların çoxu “ləkə”nin özündə əmələ gəlmir, başqa bölgələrdən gətirilir. Bu, problemin qlobal xarakterini nümayiş etdirir və çirklənmə ilə mübarizə üçün beynəlxalq səylərin zəruri olduğunu göstərir.