"Terrorsuz Türkiyə" prosesi yeni mərhələyə qədəm qoydu

PKK təşkilatı 26 oktyabr 2025-ci il tarixində İraqın şimalındakı Qəndil bölgəsində saat 11:00-da etdiyi açıqlama ilə Türkiyədən tamamilə çəkildiyini və silahlarını təhvil verdiyini bəyan edib.

Bu addım təşkilatın lideri Abdullah Öcalanın çağırışı ilə keçirilən 12-ci qurultayda qəbul edilən qərara əsaslanır.

Öcalan 27 fevral 2025-ci ildə etdiyi "Barış və Demokratik Cəmiyyət" çağırışı ilə PKK-nın silahlı mübarizəyə son verməsini və özünü ləğv etməsini istəmişdi. Bu çağırışa cavab olaraq PKK üzvləri 11 iyul 2025-ci ildə silahlarını yandıraraq təşkilatın silahlı mübarizəyə son verdiyini elan etmişdilər. Sonrakı mərhələdə, 26 oktyabrda təşkilat Türkiyədəki bütün qüvvələrini geri çəkdiyini açıqladı.

Türkiyə Prezidenti Rəcəb Tayyib Ərdoğan bu addımı dəstəkləyərək ölkədə sülh və sabitliyin təmin edilməsi istiqamətində mühüm bir addım olaraq qiymətləndirib.

Qeyd edək ki, PKK-nın silahlı mübarizəyə son verməsi və Türkiyədən çəkilməsi uzun illər davam edən qarşıdurmanın sona çatması və bölgədə sülhün bərqərar olması istiqamətində əhəmiyyətli bir dönüş nöqtəsi kimi qiymətləndirilir.